Austurlamb

Slátrun fyrir kaupendur Austurlambs mun hefjast hjá Norðlenska á föstudaginn kemur, 12. september og stendur framundir mánaðamót.

Verulegt magn hefur nú verið pantað í Austurlambi í haust, og er dæmi um að bændur hafi stöðvað pantanir í hryggi, sem eru langvinsælasta varan. Forsölu lýkur þann 12. september næstkomandi og þá munu bændur taka ákvarðanir um það magn lambakjöts, sem frátekið verður og sérverkað til sölu í gegnum Austurlamb.

Þegar slátrun lýkur, eða í upphafi októbermánaðar hefst vinnsla og pökkun og má búast við því að fyrstu sendingar úr forsölu fari áleiðis til kaupenda í viku 41 (6-10. október). Er rétt að beina þakklæti til allra fyrir biðlund, að sjálfsögðu teljum við að biðin hafi alltaf borgað sig.

Til að auðvelda val upprunans höfum við hjá Austurlambi nú sett upp hér til vinstri á síðunni valkosti þar sem fólk getur með auðveldum hætti fundið sér lambakjöt af réttum uppruna, æskilegu beitilandi eða heppilegu umhverfi að mati kaupandands. Hefur þetta vakið nokkra athygli og eru gestir síðunnar hvattir til að prófa leiðirnar, sem að endingu leiða til bóndans sem býður kjötið sem leitað er eftir.